百感交集

好耐冇寫blog啦！
忙又唔係，都係因為懶！

好想寫下最近嘅感覺！
今日同kahkah參加完一個朗誦比賽後，覺得好感慨！覺得依家d小朋友好慘（個人認為）！

點 解？

好似今日比賽，有個小朋友一路喊住叫好驚唔想比賽，但媽媽冇理會，照樣迫佢出賽！
可能阿媽想訓練佢大膽ｄ，不過如果我係個小朋友我從此會更加憎比賽同憎阿媽！

又有一個比媽媽鬧因為冇獎攞！唉真係慘！

好似kahkah咁，其實如果唔係學校欣賞佢，覺得佢OK而㨂咗佢去比賽，我係唔會自動去同佢參加！
一嚟因為我懶、二嚟我唔覺得佢有潛質，再且我唔想比佢覺得要用比賽嘅贏輸嚟肯定自己嘅價值。做好自己本分已足夠！
有獎攞當然開心、冇嘅話又唔代表佢做得唔好、唔叻，只係一定會有人叻過佢。

我對kahkah嘅要求好簡單有禮貌、守規矩、寫字靚已足夠。

諗返自己細個，簡簡單單，放學返屋企自己做功課，冇嘢學，冇補習，浄係暑假去學興趣班。
真係興趣班、冇壓力、冇比賽、純粹善用暑假！
平日係屋企同細佬打下交，整估下細細佬，咁又一日。星期六、日family day !
生活幾悠閒幼稚園、小學、中學咁又大學畢業！

眼見依家d小朋友由幼稚園開始已經要搏鬥、樣樣嘢都要學，冒求要突為而出！係咪真係快人一步，理想更易達到？
最好有埋特異功能！咁就可以成功入到名校！其實個小朋友開心咩，將來佢哋嘅童年咪只得不停學嘢嘅畫面！

我諗返我嘅童年真係好開心，得閒踩單車做自己鍾意做嘅嘢，只要冇唔合格，媽咪就OK！
放假一家人去郊外玩，輕輕鬆鬆！幾快樂！

由於kahkah幼稚園有小學嘅関係，我哋可以避過考小學呢一関！如果唔係我會顛！
朋友們帶小朋友去考學校嘅經歷真係好可怕！幼稚園要識小學嘅嘢！kahkah一定唔識！
佢學嘅全部非學術性，點考小學！所以真係感恩佢讀呢間幼稚園，可以升返上小學！
係幼稚園嘅階段，kahkah係開心嘅，因為所有課外活動都係佢鍾意嘅！係屋企除咗學校功課，佢冇其他嘢要做！
係屋企得個玩字，幸好佢當睇書都係玩！
玩埋呢年，就要收拾心情讀書！~_~;

以前嘅年代，返學真係學嘢，諗返ABC係老師教、乘數表、加減數、Tenses都係係學校學。
但係依家好似大部份嘢都係學校以外嘅地方學。

幼稚園要學小學嘅嘢，小學學中學嘅嘢！究竟想點？
諗起小一嘅生活我都有d驚、唔好話kahkah！
我係咪要諗下同kahkah去一個冇咁大壓力嘅地方讀書！ 
一到考試，家長仲大壓力過小朋友，我真係唔想連我都要溫書！
我見到周邊嘅朋友慘况，真係怕怕！


學習不是求分數一定唔啱香港用、究竟香港有冇快樂學習？