巴斯光年

kahkah 4點就瞓晏覺, 平日佢點都攪到5點幾先瞓, 點解咁乖, 因為佢知道一陣瞓醒就同表哥去睇巴斯光年....

對上一次同kahkah 睇嘅係波兒, 個次係咁啱經過戲院, 又有位, 所以先至睇.kah媽同高層都係博一博, 因為kahkah個陣好似都係2歲到, 戲院又咁黑, 又未試過睇戲, 唔知佢會唔會喊......點知kahkah不但無喊, 仲好緊張添.....

今次睇我有小小擔心, 因為有巴斯光年, 有次佢去廸士尼比佢嚇襯, 所以唔知會唔會睇睇吓要走....但佢聽到表哥一齊佢又好興奮,咁就試一試啦 !

等表哥學完琴, 我哋就出發luu.....今日阿姨同埋我哋一齊去睇戲.... 入到去仲未息燈, 哥哥放好high chair, kahkah即刻高人一等, 由於呢套係3D 所以要用眼鏡,但個眼鏡太大啦, 成日跌.... 左手popcorn ,右手眼鏡,真係好忙........可能太攰, kahkah 成日除眼鏡, 如下嘅時間唯有就由kah媽幫佢扶住個眼鏡........如果唔係咁模點睇呀!

今次佢都好留心咁睇, 不過就多咗好多問題問....點解唔係講英文嘅? (但套戲已做了一半) 點解woody  比人足咗? 點解佢哋搭車 ? 點解咁多點解,真係比佢激死! 成間戲院只得kahkah 同表哥嘅笑聲...........

 

愛上打筋斗

kahkah 係一個十分活躍嘅小朋友, 無時停, 好似個男仔咁...歲幾時我哋比佢學過gym,本來諗住佢做d運動,會食多d嘢, 高快d, 但由於佢次次上完堂都係屋企做危險動作, 所以上咗半年就無再上luu........

打筋斗, 同單槓佢係最鍾意, 成日都做, 所以每次"sir"滑梯都要swing 吓, 而近來佢仲成日打筋斗, 好咗佢知道要lum 嘅地方先可以打, 唔係個頭就慘啦 !

琴日去到廸士尼酒店食完tea, 一見到個草地又嚟啦, 仲好興奮添 !

一個下午

好耐都無試過星期日咁好天啦.... 本來諗住去踏單車, 但諗諗吓都唔得, 因為租單車嘅地方無三輪車租, kahkah咪無得玩, 所以要轉地方.....咁唔通又去食brunch ( 星期日最常做嘅 ), 突然kahkah話去廸士尼, 咁不如去酒店食嘢, 行吓啦.... kahkah 有十個興奮呀, 仲即刻玩個皇冠出嚟扮公主 !

入到去kahkah 即刻問公主係邊?mickey mouse 係邊?跟住就出去攞嘢食, 佢最鍾意食豬仔流沙飽.....仲話,下次再食過 !

食飽諗住同佢去扮公主, 點知入到去見到小朋友d假髮, 即刻驚咗, 仲要離開間房,

轉咗去playroom 玩......

呢日佢好開心, 仲開心過去廸士尼, 又sir 滑梯, 行迷宮, 碌草地.......連高層都話得閒要入去住吓 , relax 吓.........kahkah 仲話唔開生日會, 但要入嚟呢度住喎  !

約會

kahkah今日約咗朋友仔去玩, 今晚kah媽就約咗朋友食飯...唔知kahkah 依家d朋友仔會唔會好似kah媽d朋友咁, 十幾年後都一齊食飯, 一齊玩呢?

我哋約 Megan 同Jacob  一齊去玩, 本來諗住去郊外玩吓, 但呢個星期天氣都唔好, 又落雨,又凍, 所以今次嘅約會只好去室內, 咁就去咗Mega box la .....其實個度都無咩玩, 只係好耐無去過, 又唔想成日去海港城, 所以先去 ! 但唔知點解班小朋友都可以玩得咁開心!

經過一輪狂走狂跳, kahkah 都無哂電, 咁即係話又係媽媽shopping 之時......

不過shop一陣又要走luu., 因為約咗朋友食飯, 今晚嘅飯局, 其中一位係有小朋友嘅 , 所以kahkah 都無咁悶 !話時話,我真係好耐無見過呢個朋友仔啦 ! 讀中學時,我同佢一齊坐嘅, 而我哋上堂成日做自己嘢, 佢睇書, 我織冷衫, 成日比人叫我哋專心d....唔經唔覺大家都有小朋友, 一個3歲, 一個4歲, 時間過得真係快....其餘倆位加油啦, 下次要一人一b!

 

 

復活節最後一擊 - 自製復活蛋

雖然琴日先至係大陸返嚟, 好攰好眼瞓, 但都要起身啦... 因為今日兩小無猜又要出動啦 !

今日我哋會去pizza express整復活蛋.... 諗住我哋遲, 點知Jacob 仲遲過我哋 ! 去到大堂, 已經見到bear bear 係到, kahkah起初有d怕, 但係突然又話唔怕要同佢影相....

上到餐廳已經有好多小朋友係度, 但由於未見Jacob, kahkah遲遲唔肯埋枱,唔肯著圍裙, 係都話要等埋佢, 幾經辛苦下, 姐姐終於勸服佢著圍裙,開始畫蛋蛋....

原來今次係由一間畫室攪嘅, 其實kah媽一路都好想試吓art jamming, 等kahkah開咗學去試吓先 !畫咗一陣Jacob 終於嚟到啦, kahkah即刻開心哂,

 

兩小無猜畫咗一陣已經無心機畫, 交哂比阿媽luu.........

畫完蛋蛋, 就開始tea time, 兩小無猜自己樂在其中.........  Jacob 仲送咗公主水樽比kahkah 添 !

食完tea, 行一陣街, 咁又過咗一個下午, 跟住我哋又要趕下場, 去Jackie契媽屋企打邊爐luu.........

復活節第二擊 - 長隆動物園

掘完復活蛋之後, 第二日起身出發去長隆........其實kah媽唔鍾意返大陸, 高層話我有歧視, 我都覺得係, 雖然大陸已經先進咗好多, 但始終覺得有d嘢....不過個個都話長隆好玩, 而且香港又無咩玩, 好就去啦 !

我哋今次係搭巴士去, 約埋蒙古哥哥食lunch, 跟住就上車, 估計車程係3個鐘...... 可惜塞車足足搭咗4個鐘, 好咗kahkah全程瞓覺唔係就蔽啦......去到祈福已經5點幾啦... 係蒙古哥哥屋企休息一陣就出去食飯........今晚3大1細, 一共叫咗6個餸......勁呀 !kahkah 都食咗一隻乳鴿........ 跟住嘅節目係去打保齡球同打機..........聽日出發去動物園.....

瞓醒覺出去接埋信哥哥跟住出發去動物園luu..........kahkah 之前去過日本mother farm , 同埋澳洲city farm , 但動物園就第一次, 所以佢好興奮 ! 呢度真係好大, 都唔知由邊度開始行好,好咗蒙古哥哥嚟過好幾次, 成為我哋今次嘅領隊.... 河馬, 老虎仔, 長頸鹿,大笨象......行咗一陣join 埋契媽一齊坐車睇動物........

雖然條龍好長, 但估唔到唔洗20分鐘就可以上車, 真係估唔到大陸咁有效率.....原本kahkah已經好眼瞓,

但一上到車即刻醒哂, 睇到唔眨眼.......... 坐完車我哋就去餵長頸鹿

 

諗住餵埋大笨象, 可惜時間關係動物都休息啦, 只好睇埋國寶就離開.......

大家醫一醫肚之後(kahkah 已經無電瞓咗), 我哋就去睇馬戲luu, kah媽好細個都係香港睇過一次, 不過印象都好模糊.....入到場真係好多人, 多到都無位坐要坐樓梯, 真係攪笑, 估唔到睇馬戲都會有overbook 喎 !係呢個時候kahkah 起身, 咁就一路睇一路食飯....

kahkah 睇得好開心, 不斷拍手叫好.... 睇完之後, 仲問可唔可以下次再睇, 當然可以啦, 因為真係幾好睇 !

三日兩晚嘅長隆之旅就結束, 呢個旅程好relax, kahkah 好開心,真係要多謝蒙古哥哥, 唔只陪我哋遊動物園, 仲要執屋清潔 !Thanks !

 

 

復活節第一擊--掘復活蛋

今個復活節準備咗好多節目比kahkah. 今日我哋約咗Jacob 一齊去. 由於集合時間係1100 所以我哋一起身就搭的士入東涌, join 埋Jacob 入愉景灣掘復活蛋 !今日佢哋好襯呀 !

去到愉景灣好熱鬧, 兩小無猜已經好興奮, 但真係要醫肚先,食飽飽先有力掘蛋. 我哋係第一次掘蛋, 唔知係點嘅呢? 集合時間到啦, 我哋即刻去沙灘準備, 由於人太多好難先搵到位入去掘..... 當主持話開始, 所以人都衝哂入去, 只見到沙塵, 唔見蛋, 幾經辛苦之下先掘到一隻蛋,

但其他人就滿載而歸..... 不過兩小無猜玩得好開心, 咁都好嘅佢哋享受掘蛋嘅過程....同場仲見到朋友仔添......之後仲一齊玩沙,堆城堡..........

可惜天氣唔好好似想落雨, 所以我哋要離開沙灘玩攤位遊戲...........

當日除咗掘蛋, 大會預備咗好多遊戲比小朋友玩

 

由於人太多, 所以Kah 媽同Jacob媽要分別排隊比兩位小朋友玩,等佢哋玩完一樣可以即刻玩另一樣, 而佢哋都好乖.,仲識互相照顧, 乖乖坐定等玩遊戲,無四圍走.......

玩咗一陣真係落雨啦, d 攤位遊戲都要停玩, 咁我哋只好join 返高層去食嘢..... 好咗我哋早d入餐廳, 如果唔係就變咗落湯雞啦.........

雨終於都停啦, 又再次玩埋仲未玩嘅遊戲......... 其實真係好攰, 但見到佢哋兩個玩得咁開心都係值得嘅 !本來諗住一齊食埋晚餐先走, 但大家都好攰, 而我哋聽日又有另一個旅程, 所以都各自回家休息luu...........